შუქურამ გურია დაამარცხა

22 ოქტომბერს, საქართველოს ეროვნული ჩემპიონატის უმაღლესი ლიგის წითელი და თეთრი ჯგუფების თითო შეხვედრა გაიმართა.

გორის „დილამ“ საკუთარ მოედანზე ბათუმის „დინამოს“ უმასპინძლა. გუნდების სატურნირო მდგომარეობიდან გამომდინარე შეხვედრას უდიდესი მნიშვნელობა ჰქონდა. მატჩის განმავლობაში ორივე გუნდის კართან ძალიან ცოტა სახიფათო მომენტი შეიქმნა და შეხვედრაც გატანილი გოლების გარეშე 0:0 დასრულდა. „თენგიზ ბურჯანაძეზე“ გამართულ დაპირისპირებას საქართველოს ფეხბურთის ფედერაციის ხელმძღვანელები და ეროვნული ნაკრების მთავარი მწვრთნელი, ვლადიმირ ვაისი ესწრებოდნენ.

მნიშვნელოვანი სამი ქულა მოიპოვა ქობულეთის „შუქურამ“. აჭარლებმა „ჩელე არენაზე“ უშუალო კონკურენტი, ლანჩხუთის „გურია“ მიიღეს და 3:1 დაამარცხეს მეტოქე. მართალია, ანგარიში სტუმრებმა გახსნეს, მაგრამ ქობულეთელები ამან არ დააბნია და დარჩენილ დროში ლანჩხუთელთა კარში სამი უპასუხო გოლის გატანა მოახერხეს. ამ გამარჯვებით გია გურულის გუნდმა 10 ქულა მოაგროვა და უმაღლეს ლიგაში ადგილის შესანარჩუნებლად კიდევ ერთი ნაბიჯი გადადგა. გურულებმა კი, პირიქით ამ მარცხით კიდევ უფრო გაირთულეს უძლიერესთა შორის ადგილის შენარჩუნება.

უმაღლესი ლიგის დარჩენილი 4 შეხვედრა ხვალ, 23 ოქტომბერს გაიმართება. სამი მატჩის (ლოკომოტივი - ჩიხურა, სამტრედია - საბურთალო, კოლხეთი 1913 - სიონი) პირდაპირ რეპორტაჟს საქართველოს ფეხბურთის ფედერაცია შემოგთავაზებთ. თბილისის „დინამოსა“ და „ცხინვალის“ დაპირისპირებას კი, დინამოელთა ვებ-გვერდი.

დილა - დინამო ბთ 0:0

გორი, „თენგიზ ბურჯანაძე“

დილა: მუჯრიშვილი, სალუქვაძე, ღონღაძე, დან კოვა, ლომიძე, ეტუ, სამხარაძე, ერისთავი (88’ ჩახვაშვილი), წიქარიძე (46’ ცაცკრიალაშვილი), გამცემლიძე (68’ ბიასადილა), ნონიკაშვილი

მთ. მწვრთნელი: უჩა სოსიაშვილი

დინამო ბთ: ტიმოფეევი, მგელაძე, სუხიაშვილი, გეგეჭკორი, ტვილდიანი, შონია, ქავთარაძე, გოგიტიძე, გორელიშვილი (78’ ჭკუასელი), ფონიავა (58’ თევდორაძე), კვანტალიანი (65’ ლობჯანიძე)

მთ. მწვრთნელი: ლევან ხომერიკი

მსაჯები: ბ. ნინუა, დ. ჩიგოგიძე, დ. გაბისონია, შ. ქუხილავა

გაფრთხილება: 69’ გორელიშვილი, 70’ თევდორაძე, 89’ ჭკუასელი (სამივე დინამო ბთ)