2017 წლის უეფას 19-წლამდელთა ევროპის ჩემპიონატის საქართველოში ჩატარების ამბავს დღეს საგანგებო პრესკონფერენციით გამოეხმაურნენ სფფ-ის პრეზიდენტი - ზვიად სიჭინავა და გენერალური მდივანი - რევაზ არველაძე.
ზვიად სიჭინავა: „მინდა, ყველას მოგილოცოთ ეს წარმატება. მადლობა უეფას, აღმაკომის წევრებს, რომ კიდევ ერთხელ გამოგვიცხადეს ნდობა. ჩვენი ორწლიანი მუშაობა დაფასდა და გუშინ საღამოს წარმატებითაც დასრულდა. ჩვენი ყველაზე დიდი კონკურენტი იყო ინგლისი, რომელსაც დღესვე შეუძლია ჩაატაროს ნებისმიერი ჩემპიონატი და ამ ფონზე, უფრო დასაფასებელია უეფას ნდობა.
რა თქმა უნდა, გაჩნდა შეკითხვები და მინდა, დღეს ყველაფერზე გიპასუხოთ და ჩვენს გულშემატკივრებსაც განვუმარტო ბევრი რამ, რადგან იყვნენ გულდაწყვეტილებიც, რატომ არ ჩატარდება ვთქვათ ქუთაისში, ბათუმში და ა.შ.
უეფას მოთხოვნების თანახმად, ჩვენ გვჭირდება უმაღლესი დონის 4 სტადიონი - უეფას მეორე ან მესამე კატეგორიის, პლიუს ერთი სარეზერვო სტადიონი. ასევე, 8 სავარჯიშო მინდორი - ინდივიდუალურად ყველა მონაწილე გუნდისთვის. სასტუმროდან სათამაშო მოედნამდე უნდა იყოს მაქსიმუმ 1 საათის სავალი; ხოლო სავარჯიშო მოედნამდე - 15-30 წუთი.
რაც შეეხება სასტუმროებს, მოთხოვნების მიხედვით, ჩვენ გვჭირდება 132-ნომრიანი ორი სასტუმრო და ერთი 30-ნომრიანი, უეფასა და მსაჯებისთვის. ასეთ მაღალ მოთხოვნებს გვიკმაყოფილებს თბილისში არსებული ორი სასტუმრო - „ჰოლიდეი ინ“ და „რედისონი“.
ჩემპიონატამდე 20 თვით ადრე, ანუ 2015 წლის სექტემბერში შესამოწმებლად ჩამოვა უეფას კომისია და მათ ბევრი რამ მზადების პროცესში უნდა დავახვედროთ.
ჩემთვის ყველაზე მნიშვნელოვანი ისაა, რომ გვექნება ახალი, ძალიან მაღალი დონის სტადიონები, ყველანაირად მოწესრიგებული, მინიმუმ 3 ათას ადგილიანი და რა თქმა უნდა, ჩვენი 19-წლამდე ნაკრები ფინალურ ეტაპზე საკვალიფიკაციო ეტაპების გავლის გარეშე მოხვდება.
ხელოვნურსაფარიან მოედნებზე არც ვარჯიშები იქნება და მითუმეტეს, არც თამაშები. „მიხეილ მესხი“, „მიხეილ მესხი 2“, რუსთავი, გორი და მცხეთა იქნებიან ჩემპიონატის მასპინძელი სტადიონები. "მიხეილ მესხზე" ჩატარდება ფინალური მატჩი. ძალიან მალე დაიწყება რუსთავისა და მცხეთის სტადიონების საფუძვლიანი რეაბილიტაცია.
რა თქმა უნდა, სახელმწიფოს ჩართულობა უმნიშვნელოვანესია და ჩვენ ერთად ვიმუშავებთ, ისევე, როგორც სუპერ თასის შემთხვევაში. ეს საკითხი ჩვენ ერთი წლის წინ გვქონდა გატანილი სამთავრობო კომისიის სხდომაზე და სახელმწიფოს მხარდაჭერაც მივიღეთ. ეს დაფიქსირებულია პრემიერის დადგენილებაშიც.
ეს არ არის პატარა ღონისძიება და ჩვენთვის, ფედერაციის თითოეული თანამშრომლისთვის დიდი პასუხისმგებლობაა.“
რევაზ არველაძე: „ამ საკითხზე მუშაობა რამდენიმე წლის წინ დაიწყო და ნაბიჯ-ნაბიჯ მივდიოდით. ამ გეგმის ნაწილი იყო ისიც, რომ ყოველწლიურად ასაკობრივი ნაკრებების საკვალიფიკაციო ეტაპებსა და ელიტრაუნდებს ვმასპინძლობთ. ძალიან დიდ როლს თამაშობს ჩვენი ასაკობრივი ნაკრებების წარმატებებიც, რადგან ჩვენ ყველასთვის ანგარიშგასაწევი ძალა ვართ და რა თქმა უნდა, უეფას სურს ევროპის ჩემპიონატებზე ძლიერი ნაკრებები იხილოს.
რაც ყველაზე მთავარია, გამართული ინფრასტრუქტურა დარჩება მასპინძელ ქალაქებს, იქ მოთამაშე კლუბებს. ქართველი ბავშვები ძალიან მაღალი დონის ევროპული ნაკრებების თამაშებს საკუთარი თვალით ნახავენ ჩვენ კი, გვექნება ევროპის ჩემპიონატის ჩატარების გამოცდილება და უფრო სერიოზულ ღონიძიებებზე ფიქრიც შეიძლება.
მოკლედ, უნდა დავირაზმოთ და დავიწყოთ მუშაობა. ორ წლიან პერიოდში, ასეთი მაღალი დონის ღონისძიებები - სუპერ თასი და ევროპის ჩემპიონატი ძალიან ბევრ ქვეყანას ენატრება.“
სფფ-ის პრესსამსახური