სფფ-ის ლაგოდეხის ტექნიკური ცენტრის მოედანზე, კახეთის ოთხი მუნიციპალიტეტის, რვა საჯარო სკოლის ბავშვებს შორის სახალისო მატჩები გაიმართა. მონაწილე გუნდებს, ღონისძიების ბოლოს საქართველოს ფეხბურთის ფედერაციის პირველმა ვიცე-პრეზიდენტმა - კახა ჭუმბურიძემ სიმბოლური საჩუქრები და სიგელები გადასცა.
მატჩებში მონაწილეობას იღებდნენ: თელავის ნიკო მუსხელიშვილის სახ. N3 საჯარო სკოლა, ლაგოდეხის რ-ნის სოფელი შრომის საჯარო სკოლა, საგარეჯოს რ-ნის სოფელი ბადიაურის საჯარო სკოლა, საგარეჯოს რ-ნის სოფელი კაჭრეთის საჯარო სკოლა, საგარეჯოს რ-ნის სოფელი დიდი ჩაილურის საჯარო სკოლა, საგარეჯოს რ-ნის სოფელი მანავის საჯარო სკოლა, სიღნაღის რ-ნის სოფელი ტიბაანის საჯარო სკოლა.
ღონისძიება უეფას მასობრივი ფეხბურთის კვირეულის ფარგლებში გაიმართა. კვირეულის ფარგლებში, რომელიც 2 ოქტომბრის ჩათვლით გაგრძელდება, საქართველოს ფეხბურთის ფედერაციის წარმომადგენლები საქართველოს რამდენიმე რეგიონს ესტუმრებიან. ღონისძიებები სამტრედიაში, ქუთაისსა და თბილისში ჩატარდება.
უეფა-ს მასობრივი ფეხბურთის კვირეული მთელი ევროპის მასშტაბით ყოველწლიურად იმართება და მიზნად ფეხბურთის პოპულარიზაციას და ფეხბურთში ჩართული ადამიანების რაოდენობის ზრდას ისახავს.
