სიახლეები

საქართველოს ფეხბურთის ფედერაციას და IDS ბორჯომი თბილისს შორის თანამშრომლობის მემორანდუმი გაფორმდა

სფფ
გაუზიარე

3 სექტემბერს, სასტუმრო „სტამბაში“, საქართველოს ფეხბურთის ფედერაციასა და კომპანია IDS ბორჯომი თბილისს შორის თანამშრომლობის მემორანდუმი გაფორმდა.

მემორანდუმის თანახმად, ქართული მინერალური წყალი "ბორჯომი", 2020 წლის ბოლომდე საქართველოს ფეხბურთის ფედერაციის პარტნიორი გახდა. პარტნიორობის ფარგლებში, კომპანია IDS ბორჯომი სფფ-ის ეგიდით გასამართ ღონისძიებებს სასმელი წყლით უზრუნველყოფს.

მემორანდუმს ხელი, საქართველოს ფეხბურთის ფედერაციის გენერალურმა მდივანმა დავით მუჯირმა და კომპანია IDS ბორჯომი თბილისის გენერალურმა დირექტორმა გიორგი ერაძემ მოაწერეს.

ღონისძიების დასრულების შემდეგ კი, მათ მედიისთვის კომენტარი გააკეთეს:

💬 დავით მუჯირი - საქართველოს ფეხბურთის ფედერაციის გენერალური მდივანი: „კომპანია „ბორჯომთან“ პარტნიორობა ჩვენთვის ძალიან მნიშვნელოვანი შენაძენია. მოგეხსენებათ, მიმდინარე წელს საქართველოს ფეხბურთის ფედერაციის ეგიდით, არაერთი ღონისძიება იმართება. გარდა ეროვნული ჩემპიონატის მიმდინარე წლის გათამაშებისა, წინ გველის როგორც ეროვნული, ისე ასაკობრივი ნაკრებების მატჩები. მიხარია, რომ ჩვენთვის ასეთ მნიშვნელოვან პერიოდში, დიდი ტრადიციების მქონე კომპანია ქართული ფეხბურთის მხარდამჭერი გახდა. აღსანიშნავია, რომ წლევანდელი წელი საიუბილეო წელია საქართველოს ფეხბურთის ფედერაციისთვის, „ბორჯომი“ კი 130 წლის იუბილეს აღნიშნავს. დარწმუნებული ვარ, ამ საიუბილეო წელს, ერთად აუცილებლად მივაღწევთ წარმატებას.“

💬 გიორგი ერაძე - კომპანია IDS ბორჯომი თბილისის გენერალური დირექტორი: „ჩვენ, როგორც კომპანია, რომელიც საზოგადოებას ჯანმრთელობისთვის სასარგებლო და აუცილებელ პროდუქტს, წყალს, ვთავაზობთ, აქტიურად ვუწევთ ჯანსაღი ცხოვრების წესს პოპულარიზაციას, ასევე გამოვირჩევით მაღალი სოციალური პასუხისმგებლობით -  სწორედ ამიტომ “ბორჯომი” ყოველთვის იყო ქართული სპორტის და მათ შორის ფეხბურთის გულშემატკივარი. წელს განსაკუთრებით მნიშვნელოვანი წელია ჩვენი კომპანიისთვის, „ბორჯომის“ ბრენდს 130 წლის იუბილე აქვს და მიხარია რომ ამ მნიშვნელოვან საიუბილეო წელს, საქართველოს ფეხბურთის ფედერაციის მხარდამჭერები გავხდით, მინდა წარმატებები ვუსურვო ჩვენს ფეხბურთელებს.“