მიხეილ მესხის სახელობის სტადიონზე საქართველოს ფეხბურთის ფედერაციის პირველმა ვიცე პრეზიდენტმა, კახა ჭუმბურიძემ, თბილისის ფეხბურთის ფედერაციის პრეზიდენტთან, გრიშა ცაავასთან ერთად ეროვნული კატეგორიის C ლიცენზიის მქონე მწვრთნელთა გადამზადების კურსების მონაწილეებს კუთვნილი ლიცენზიები გადასცა.
ორდღიან სწავლებაში, მონაწილეობა თბილისის, აფხაზეთის, მცხეთა-მთიანეთის, ქვემო ქართლისა და სამხრეთ ოსეთის რეგიონული ფედერაციებიდან 100-ზე მეტმა მწვრთნელმა მიიღო. კურსები როგორც თეორიული, ისე პრაქტიკული ნაწილისგან შედგებოდა. გადამზადების შედეგად თითოეულ მათგანს ეროვნული კატეგორიის C ლიცენზიის ნაცვლად უეფას კატეგორიის ლიცენზია გადაეცა, რაც მწვრთნელებს ევროპის მასშტაბით მუშაობის საშუალებას მისცემს.
თბილისში სფფ-ის ტექნიკურ ცენტრ ბასაზე გამართული კურსებით ეროვნული კატეგორიის C ლიცენზიის მქონე მწვრთნელების გადამზადების პროცესი დასრულდა და ამიერიდან C ლიცენზიის კურსები მხოლოდ უეფას მწვრთნელთა განათლების კონვენციის შესაბამისად გაიმართება.შეგახსენებთ, რომ აღნიშნული კურსი სფფ-ის ტექნიკური დეპარტამენტის ორგანიზებითა და ქართული ფეხბურთის განვითარების ფონდის დაფინანსებით ხორციელდება.
