31 მაისს, უეფას 21-წლამდე ევროპის ჩემპიონატისათვის განახლებულ მესხის სტადიონზე პირველი ტესტ მატჩი გაიმართა. სატესტო შეხვედრა ეროვნული ლიგა 2-ის გუნდების, დინამო თბილის 2-ის და ბოლნისის სიონის მონაწილეობით შედგა.
უეფას წარმომადგენლებთან ერთად, 5 ივნისის ჩათვლით, როგორც მესხის სტადიონზე, ისე რამაზ შენგელია არენაზე კიდევ რამდენიმე ტესტ მატჩი გაიმართება, სადაც შეხვედრის ორგანიზებისთვის საჭირო ტექნიკური დეტალები და საოპერაციო სისტემა გამოიცდება.
უეფას 21-წლამდე ევროპის ჩემპიონატისთვის მზადების ფარგლებში, მთელი ქვეყნის მასშტაბით არაერთი ინფრასტრუქტურული პროექტი განხორციელდა. აშენდა და რეაბილიტაცია ჩაუტარდა სავარჯიშო მოედნებსა და სტადიონებს. შედეგად, საქართველოში უეფას ყველაზე მაღალი, მეოთხე კატეგორიის მოთხოვნებს ოთხი სტადიონი დააკმაყოფილებს.
უეფას 21-წლამდე ევროპის ჩემპიონატი საქართველოსა და რუმინეთში 21 ივნისიდან 8 ივლისის ჩათვლით გაიმართება. თამაშები საქართველოს სამ ქალაქში – თბილისში, ქუთაისსა და ბათუმში გაიმართება. ევროპის ჩემპიონატის ფინალურ შეხვედრას, 8 ივლისს, ბათუმი არენა უმასპინძლებს.
მატჩებზე დასასწრები ბილეთების შეძენა სპეციალურ ვებგვერდზე, under21tickets.ge-ზეა შესაძლებელი.
